مننطرك من سني لَـ سني،
مننطرك بفصول السني،
بعتمة الفصول...
مننطرك كل يوم، وكل ساعا، ع مفارق حياتنا، ع وسع أوجاعنا،
بأحلامنا...
مننطرك مع كل شرقة شمس، وعند كل غياب،
مع كل نسمة ريح... ناطرينك.
بتعرف مين اللي ناطرينك؟
هودي اللي بيشبهوك: الفُقرا، المحتاجين، المتألمين، المتروكين، الجوعانين... ناطرينك...
هودي المشرّدين اللي شلّحوهن وطنن... ناطرينك...
هودي المهجّرين اللي ما بيسترجو يرجعو ع بيوتن، لأنا تهدّمت، أوناطرن الموت بين الحيطان... ناطرينك...
هودي البردانين وما حدا بيدفّين، ولا بيتطلّع فين، عروقن بتتجمّد من كتر البرد ولاطيين تحت خيم النايلون وبيوت التنك... ناطرينك...
هودي الملهوفين للكلمي، كلمة الله، للروح القدس روح الله، اللي إجا وخلق بأسطبل الحيوانات لـ نفّخو عليه تـَ يدفا، وما إجا بتخت الملوك وقصور الأغنيا... هودي ناطرينك...
ناطرين اللي إجا لابس بإجرو الصندل وع جسمو توب الجنفيص وحامل بإيدو العصا، وما كان حاطط ع كتافو مشلح قيافا، ولا بإيدو في صولجان الكبريا... ناطرينك...
ناطرينك اللي بيشبهوك، لـ ما عندن حقّ رغيف الخبز، ولا شجرة العيد.
اللي عاملينلك بقلوبن مغارات تولد من جديد، وما معن يعمّرو "مغارات" عم تتباهى بحالا قديش كلّفت مصاري... ناطرينك...
اللي ما في شي بيدفّين إلا وهج إيمانك، اللي قسيت علين الدني وبرد كوانين عم يخرق بعضامن... ناطرينك ...
اللي ما معن يشتروا هدية العيد، ما حدا بيفكر فين لا بالعيد ولا بأي وقت، بس مقدّمينلك قلوبن هدية العمر لأنو بالنسبي إلن أنت العيد الما بيخلص... ناطرينك...
بعيدك يا إبن ألله، يا روح ألله وكلمتو، منزيّن بيوتنا بالشجر والطابات الملوّني، ومنعبّي شوارعنا ومحلاتنا ومدننا وضيعنا بالزيني... ومنفضّي قلوبنا... منّك.
بعيدك يا بيّ الفقرا والمساكين، منصرف المصاري بلا حساب تَـ نشتري لحالنا اللي مش عايزينو، وما منصرف منن ولا ليرا تـ نعطي إخوتنا بالإنسانيي، اللي أكتر شي عايزينو...
بعيدك يا خيّ المقهورين والموجوعين، منشوف الوجع والقهر والموت حوالينا... ومنغمّض عيوننا تـ ما نشوفون...
بعيدك يا رسول التواضع والمحبّي، ما منشوف الّا المناصب والسلطا والمصاري والجاه والكبريا، ومننسى أنك غسّلت جرين تلاميذك...
بعيدك يا رب السلام، عم يدبحو السلام، بأرض السلام...
لازم تجي بس مش متل ما جيت طفل بمغارا...
تعا وبإيدك كرباج السلطا...
شحاط قيافا من هيكلك، والتجّار بإسمك، كسّر الأصنام البشريي اللي بتركّعنا قدّاما، ووعّي فينا شي من الكرامي الأنسانيي تـ نعرف نعيّد معك... وفيك... وبإسمك... أنت يا بيّ الموعودين، وعدنا أنك رح تجي والعصا بإيدك...
ناطرينك...
